SHBA-ja përgëzon Kosovën për kthimin e shtetasve të saj nga Siria

Shtetet e Bashkuara të Amerikës kanë përgëzuar kthimin e 110 shtetasve kosovarë nga Siria.

“Me këtë riatdhesim, Kosova po vendos një standard të rëndësishëm për të gjithë anëtarët e Koalicionit Global për të mposhtur ISIS-in dhe bashkësinë ndërkombëtare në ndjekjen e së njëjtës rrugë”, thuhet në deklaratën e ambasadës së SHBA-ve, shkruan lajmi.net.

Më herët në konferencë për media, ministri i drejtësisë Abelard Tahiri tha se SHBA-të kanë luajtur rol kyç në kthimin e kosovarëve nga Siria.

Kjo është deklarata e plotë e ambasadës:

“SHBA-të e përgëzojnë Kosovën për kthimin e 110 shtetasve të saj nga Siria: katër prej të cilëve supozohet të kenë qenë luftëtarë të ISIS-it dhe të tjerë, gra dhe fëmijë. Me këtë riatdhesim, Kosova po vendos një standard të rëndësishëm për të gjithë anëtarët e Koalicionit Global për të mposhtur ISIS-in dhe bashkësinë ndërkombëtare në ndjekjen e së njëjtës rrugë. I duartrokasim bashkëndjenjës së treguar për të pranuar kthimin të këtij numri të madh të civilëve.

SHBA-të mbesin mirënjohëse ndaj Forcave Demokratike të Sirisë për mbështetjen e tyre në riatdhesim dhe për vazhdimin e mbajtjes humane nën arrest të të qindra luftëtarëve të ISIS-it nga dhjetëra vende tjera”.