Skandal pas skandali në listën e AAK-së, dy personat e ndaluar për keqpërdorim ishin takuar edhe me burrin e Albana Bytyqit

Para dy dite dy komisionerë janë arrestuar nën dyshimin për keqpërdorime me vota në zgjedhjet e 14 shkurtit 2021, shkruan IndeksOnline.

S.M dhe A.K u ndaluan pas publikimit të një videoincizimi në të cilin thuhej se kandidatja për deputete nga AAK-ja, Meliza Haradinaj-Stublla me ndihmën e bashkëshortit kishte manipuluar me rezultatin.

Të njëjtit kanë thënë para prokurorit të rastit se janë takuar me bashkëshortin e kandidates për deputete, Albana Bytyqi, duke mos bërë të ditur arsyet e takimit.

Por Bytyqi ka mohuar të ketë ndodhur një gjë e tillë. “S’kemi të bëjme asgjë me ta”, tha ajo.

Kurse bashkëshorti, Jetmir Bytyqi ka thënë se nuk e ka ftuar askush nga Policia e Prokuroria, duke e cilësuar gënjeshtër deklaratën e të arrestuarve.

IndeksOnline ka tentuar ta kontaktoj Bytyqin por e njëjta nuk i është përgjigjur telefonatave.

Pas shpalljes së rezultateve përfundimtare, Meliza Haradinaj-Stublla ishte në mesin e deputetëve të legjislaturës së tetë të Kuvendit të Kosovës, tani pas rinumërimit të disa vendvotimeve ajo ka mbetur jashtë Kuvendit.

Vendin e saj e zuri Albana Bytyqi e cili në zgjedhjet e fundit mori 4 mijë e 420 vota. Kjo e fundit u ankua që ish-kandidatja e AAK-së i ka vjedhur vota.