Fjalë Kyçe

Thaçi: Qeveritë shkojnë e vijnë, por raportet me SHBA-në nuk cenohen asnjëherë

Thaçi: Qeveritë shkojnë e vijnë, por raportet me SHBA-në nuk cenohen asnjëherë

Presidenti i Kosovës, Hashim Thaçi, ka thënë se marrëdhëniet mes Kosovës dhe Shteteve të Bashkuara të Amerikës dhe Bashkimit Evropian nuk do të cenohen asnjëherë.

Në një deklaratë për “Zërin e Amerikës”, Thaçi ka thënë se pas zgjedhjeve të parakohshme të 6 tetorit, Kosova duhet të formojë shpejt qeveri të re, që do të përballet me sfidat që e presin vendin.

“Por fillimisht do të jenë prioritetet e brendshme e pastaj do të diskutohet edhe për mundësinë e tejkalimit të të gjitha pengesave për vazhdimin e dialogut, që të mos jetë pengesë as Kosova e as Serbia”, ka thënë ai.

Bisedimet janë pezulluar që nga nëntori i vitit të kaluar kur Kosova u vuri taksë prej 100 për qind mallrave serbe në shenjë kundërshtimi ndaj qasjes së Serbisë ndaj shtetësisë së saj. Beogradi kushtëzon rifillimin e bisedimeve me heqjen e taksës.

Thaçi ka thënë se duhet një debat i brendshëm sa u përket taksave në të cilën duhet të përfshihen edhe partitë politike, qeveria, parlamenti dhe shoqëria e Kosovës.

Shtetet e Bashkuara kanë kërkuar në vazhdimësi pezullimin e taksës, ndërsa Bashkimi Evropian heqjen e saj për të rihapur bisedimet me Serbinë, por qeveria në largim e Kosovës i ka rezistuar kësaj trysnie duke nxitur shqetësime për cenimin e marrëdhënieve me aleatët e saj.

“Qeveritë mund të vijnë dhe mund të shkojnë, por raportet tona me Shtetet e Bashkuara dhe Bashkimin Evropian nuk do të cenohen asnjëherë”, ka thënë Thaçi.

Ai beson së emërimi i Mathew Palmerit si i dërguar i posaçëm për Ballkanin Perëndimor është mesazh i qartë se Shtetet e Bashkuara do të jenë aktive në rajon dhe në procesin e bisedimeve Kosovë-Serbi. Palmer më herët gjatë javës deklaroi se SHBA-ja do një zgjidhje që të jetë në pronësi lokale, që të jetë e qëndrueshme dhe e pranueshme për të dyja palët.

Thaçi, në anën tjetër, ka deklaruar se vetëm marrëveshja për njohje-reciproke ka kuptim për popullin e Kosovës.

“Natyrisht se në kuadër të dialogut dhe negociatave që do të zhvillohen do të ketë opinione të ndryshme të cilat unë mendoj se në fund do të rezultojnë më një marrëveshje përfundimtare historike me njohje reciproke”, tha ai.

Ai po ashtu ka thënë se asnjëherë nuk ka qenë në tryezën e bisedimeve mundësia e ndryshimit të kufijve, ide që ishin hedhur në verën e vitit të kaluar si mundësi për të arritur një marrëveshje ndërmjet palëve. Presidenti serb Aleksandër Vuçiq kishte theksuar se angazhohet për një vënie kufiri ndërmjet serbëve dhe shqiptarëve, që nënkupton ndarjen e Kosovës, ndërsa Thaçi kishte hedhur idenë për korrigjim kufiri që nënkupton sipas tij, bashkimin me Kosovën të Luginës së Preshevës.

“Kurrë nuk ka qenë në tryezë ndryshimi i kufijve. Integriteti territorial i Republikës së Kosovës është i pacenueshëm. Të gjithë ata që kanë folur për ndryshim të kufijve të Kosovës kanë prezantuar një mashtrim për opinionin publik me karakter elektoral. Territori i Kosovës është i paprekshëm. Por unë gjithmonë respektoj të drejtën e Preshevës, Medvegjës e Bujanocit që t’i bashkëngjiten Republikës së Kosovës, pa u cenuar asnjë centimetër i territorit të Kosovës. Të gjitha opinionet tjera janë gënjeshtra”, tha ai.

Thaçi i bëri këto komente  gjatë vizitës në Iowa ku vizitoi Gardën Kombëtare, Asamblenë e Përgjithshme të këtij shteti amerikan, takoi guvernatoren, Kim Reynolds si dhe studentet nga Kosova.

Vazhdimi i bisedimeve mund të pritet pas zgjedhjeve në Kosovë dhe diplomatët shpresojnë që kjo të ndodhë para se Serbia të hyjë në periudhën e zgjedhjeve që mbahen në pranverën e vitit të ardhshëm.