Tottenhami e shkarkon trajnerin Nuno Espirito Santo

Tottenhami e ka shkarkuar trajnerin Nuno Espirito Santo, vetëm katër muaj pasi ishte emëruar në krye të ekipit.

Espirito Santo largohet nga Tottenhami pas vetëm 17 ndeshjeve në krye të skuadrës.

Në një njoftim për media, Tottenhami shkroi: Klubi konfirmon sot se Nuno Espirito Santo dhe stafi i tij i trajnerëve, Ian Cathro, Rui Barbosa dhe Antonio Dias, janë liruar nga detyrat e tyre”.

Ish-trajneri i Chelseat dhe Interit, Antonio Conte, të cilin Tottenhami e kërkoi para se ta emëronte Nunon në verë, do të udhëtojë drejt Londrës sot për bisedime me klubin londinez, sipas Sky Italia.

Bisedimet mes Tottenhamit dhe Contes, i cili është i papunë që prej se u largua nga Interi në verë, janë në fazën përfundimtare.

Tottenhami është në vendin e tetë në Premierligë, 10 pikë mbrapa liderit, Chelsea, pas humbjes 3:0 kundër Manchester Unitedit të shtunën.

Nuno, 47-vjeçar, kishte nënshkruar marrëveshje 2-vjeçare në qershor si pasues i Jose Mourinhos në Tottenham, por qëndrimi i tij në klub nuk zgjati më shumë se katër muaj dhe 17 ndeshje në përgjithësi.

Largimi i Nunos nënkupton se Tottenahmi është në kërkim të trajnerit të katërt në tri vitet e fundit. /Gazeta Express/