Tre të vdekur nga COVID-19 në Shqipëri

Në 24 orët e fundit në Shqipëri janë regjistruar tri viktima dhe 477 raste të reja me COVID-19, një rritje e mëtejshme krahasuar me dje, kur ishin shënuar 451 raste të reja, ka bërë të ditur Ministria e Shëndetësisë.

Sipas Ministrisë së Shëndetësisë, janë kryer 7,733 testime nga të cilat kanë rezultuar pozitivë 477 qytetarë, në këto bashki: 174 në Tiranë, 46 në Shkodër, 20 në Sarandë, 19 në Elbasan, 17 në Berat, nga 16 raste në Malësi e Madhe, Lezhë, 14 në Vau i Dejës etj.

Aktualisht janë 3.782 pacientë aktivë me COVID-19 në të gjithë vendin. Në Spitalin Infektiv po marrin trajtim 56 pacientë. Me gjithë përpjekjet e stafit mjekësor, në 24 orët e fundit kanë ndërruar jetë një 57-vjeçar nga Tirana, një 76-vjeçar nga Vlora dhe një 84-vjeçar nga Fieri.

Janë shëruar 67 qytetarë gjatë 24 orëve të fundit, duke e çuar numrin e të shëruarve në 130.822 që nga fillimi i epidemisë.

Shqipëria që nga fillimi i pandemisë ka kryer 972,870 testime, prej të cilave 137,075 kanë dalë raste pozitive, prej tyre 130,822 janë shëruar, 3,782 janë aktive, ndërsa luftën me sëmundjen infektuese e kanë humbur 2,471 pacientë.