Fjalë Kyçe

Vasfije Krasniqi viziton vendin ku u dhunua para 20 vitesh

Vasfije Krasniqi viziton vendin ku u dhunua para 20 vitesh

Këtë pranverë po shënohet 20-vjetori i krimeve të luftës në Kosovë. Gjatë këtyre ditëve janë shënuar përvjetorë të shumë masakrave, vrasjeve, plagosjeve, torturave e keqtrajtimeve dhe krimeve tjera të luftës.

20-vjetorin e këtyre krimeve e kujtojnë edhe shumë të mbijetuare të dhunës seksuale gjatë luftës në Kosovë, por të cilët asnjëherë nuk u deklaruan publikisht për tmerret e përjetuara.

E mbijetuara e dhunës seksuale gjatë luftës në Kosovë Vasfije Krasniqi Goodman, me ndihmën dhe mbështetjen e Qendrës Kosovare për Rehabilitimin e të Mbijetuarve të Torturës foli për herë të parë publikisht për përjetimin e saj gjatë luftës.

Më 14 prill 1999, Vasfije Krasniqi Goodman, në atë kohë 16-vjeçare, u rrëmbye nga një polic serb dhe u dërgua në fshatin Babimost të Komunës së Obiliqit, ku u dhunua seksualisht nga një oficer policor dhe një civil.

Në 20-vjetorin e këtij tmerri, Krasniqi ka vendosur që ta vizitojë vendin e krimit, ku përkundër përpjekjeve për të kërkuara drejtësi, dhunuesit kanë mbetur të pandëshkuar.

Nesër, në ora 13:00, në një aktivitet vetëm për mediat, përfaqësuesit e QKRMT-së dhe aktivistë tjerë të të drejtave të njeriut, së bashku me Vasfije Krasniqi Goodman do të bëjnë një vizitë në vendin ku ka ndodhur krimi në fshatin Babimost ku vet Krasniqi do të ketë një fjalim rasti para të pranishmëve.