Veliu: Xhelal Sveçla duhet të turpërohet, të jap llogari për hyrjen në dhomat e përgjimeve

Gazeta Alo

Publikuar: 27/10/2020 20:27

Ministri i Punëve të Brendshme, Agim Veliu ka shpërthyer në akuza të rënda ndaj anëtarit të VV’së, Xhelal Sveçla.

Veliu ka thënë se Sveçla me shokë duhet të turpërohet pasi la qytetarët e Kosovës pa targa dhe pa dokumente të tjera personale.

Ai tha se Sveçla po bën përpjeke dëshpëruese dhe gënjeshtra ndaj tij e po manipulon publikun për targat RKS.

Ministri Veliu akuzoi Sveçlën se gjatë qëndrimit të tij në MPB, nuk kreu asnjë punë por vetëm i dha leje të lëvizjes dostave të tij, sipas tij ai duhet të jap llogari për hyrjen në dhomat e përgjimeve dhe për kasafortën ku gjendeshin dokumente të klasifikuara.

Postimi i plotë nga Veliu:

Xhelal Sfeçla me shokë, në vend se të turpërohet që la qytetarët e Kosovës pa targa dhe pa dokumente të tjera personale, po bën përpjekje dëshpëruese, të shoqëruara me gënjeshtra, me qëllim të manipulimit të opinionit publik për këtë proces.

Njeriu, i cili gjatë qëndrimit të tij në MPB, nuk kreu asnjë punë përveç që dha leje të lëvizjes për dostat e tij, në vend se të jap llogari për hyrjet në dhomat e përgjimeve dhe për kasafortën ku gjendeshin dokumente të klasifikuara që e la të hapur kur doli, gjen kohë dhe pa fije turpi del në një emision dhe hedh akuza për procedura e tenderë, të cilat nuk kanë asnjë lidhje me mua.

Për hir të informimit të drejtë të opinionit publik, ju informoj se procedura e prokurimit për “Furnizim emergjent me targa të automjeteve” nuk bëhet në baza mujore, ndërsa çmimi i tyre caktohet në bazë të targave për njësi.

Furnizimet emergjente me targa janë me çmime më të lira, krahasuar me kontratën e rregullt të vitit 2016, pra është i pavërtetë pretendimi se procedurat e tjera kanë çmimin tri herë më të shtrenjtë.

Ministria e Punëve të Brendshme, përmes procedurës së hapur ka iniciuar aktivitetin e prokurimit “Furnizimi me targa të automjeteve” në vitin 2018, vit në të cilin unë nuk isha ministër.

I njëjti aktivitet është në procedurë ankimore dhe në bazë të legjislacionit në fuqi, Autoriteti Kontraktues nuk mund të iniciojë dy aktivitete të prokurimit për të njëjtën çështje në të njëjtën kohë.

Fjalë Kyçe

Veliu: Xhelal Sveçla duhet të turpërohet, të jap llogari për hyrjen në dhomat e përgjimeve

Lajme të tjera