Xhafer Tahiri do të jetë edhe një herë kandidat për kryetar të Komunës së Vushtrrisë nga Lidhja Demokratike e Kosovës.
Këtë e bëri të ditur kryetari i Lidhjes Demokratike të Kosovës, Lumir Abdixhiku, me anë të një postimi në rrjetin social Facebook, duke shtuar se është kënaqësi e veçantë për të që një njeri si Xhafer Tahirin, ta nominoj edhe për një mandat në krye të Vushtrrisë, transmeton Klankosova.tv.
“Ai i dha kahje ndryshe zhvillimit të Komunës dhe për këtë do të kërkojë aprovimin e Kryesisë.I njohur si një ndër lokalitetet antike dardane, Vushtrria, ka për nderë që një kryetar si Xhafa ta vazhdojë punën e kreut të Komunës edhe për 4 vjetët e ardhshme në të mirë të të gjithë banorëve të saj”.
“Ai ka vizion të qartë se si duhet të duket qyteti e fshatrat e Komunës nën udhëheqjen e LDK-së, i përkrahur nga të gjitha strukturat pa dallim. Për një mandat, ka siguruar kyçje në ujë për 7000 familje vushtrriase; ka krijuar Zonën Ekonomike me plot 800 vende pune; ka dhënë shembull nacional në mbledhjen e mbeturinave; ka ndërtuar dy çerdhe e një Qendër Mjekësie; e dhjetëra projekte infrastrukturore. Xhafa e meriton përkrahjen e secilit prej nesh sepse gjatë mandatit të parë, me punën dhe përkushtimin e tij na ka bërë të gjithëve krenarë”, ka shkruar Abdixhiku.