Zyra e Kryeministrit i reagon Haradinajt: S’ka kërkesë për proteza për invalidë që s’e kemi trajtuar

Zyra për Çështje të Kategorive të Dala nga Lufta e UÇK-së, që është në kuadër të Zyrës së Kryeministrit, i ka reaguar kryetarit të AAK-së Ramush Haradinaj duke thënë se nuk ka pranuar kërkesë për proteza për invalidë veteranë e të cilën nuk e ka trajtuar.

Në reagimin e tyre thuhet se kërkesa e fundit në lidhje me protezat për invalidë veteranë ka ndodhur vitin e kaluar gjatë qeverisjes së kaluar, ku është ndarë buxhet dhe shoqata e invalidëve veteranë është në zbatim e sipër të asaj kërkese.

“Zyra për Çështje të Kategorive të Dala nga Lufta e UÇK-së është e hapur për shqyrtim dhe trajtim të çfarëdo kërkese, dhe çështjet e këtilla si ofrimi i protezave për invalidë veteranë do të konsiderohen ashtu siç edhe janë, esenciale. Synim e zotim i joni është institucionalizimi i këtyre shërbimeve, në mënyrë që të ketë organizim e strukturim të ofrimit të tyre dhe kujdesi për invalidët veteranë të jetë maksimal”.

Ky reagim vjen pasi kryetari i AAK-së Ramush Haradinaj ka thënë se bashkatdhetarët janë organizuar dhe kanë mbuluar shpenzimet për ndërrimin e protezave për dy ish-luftëtarë.

Ai ka thënë se ky organizim i bashkatdhetarëve ka ndodhur pasi qeveria nuk po kujdeset për invalidët e luftës.

“Gjatë Luftës Çlirimtare, mijëra bashkëluftëtarë u plagosën dhe u lënduan, e shumë prej tyre kanë nevojë për proteza për të ecur, parë e funksionuar normalisht në jetën e përditshme. Ato proteza duhet të ndërrohen periodikisht dhe pasi që janë të papërballueshme për xhepin e invalidëve, zakonisht qeveria merr përsipër këto shpenzime. Në mungesë të trajtimit dhe kujdesit për invalidët e luftës nga kjo qeveri, ka pasur organizim nga bashkatdhetarët, në rastin e ndërrimit të protezave për luftëtarët e dalluar të UÇK-së Naim Qerimaj dhe Selmon Hasanaj. Falënderoj veçanërisht bashkatdhetarët Shkelzen Sadikaj dhe Bajram Mulaj, si dhe secilin emër për emër që kontribuoi për këta luftëtarë lirie. Janë edhe shumë të tjerë që kanë nevojë për këtë ndihmë. Kërkoj që qeveria e Kosovës të mos neglizhojë detyrat e veta dhe obligimin që e kemi për Invalidët e Luftës dhe sikur qeveritë para saj, të mbështes këtë trajtim të nevojshëm shëndetësor”.