“Kemi ulje të importit, rritje të prodhimit vendas”

Astrit Panxha nga Klubi i Prodhuesve të Kosovës, ka thënë se tarifa 100% ndaj Serbisë dhe Bosnjës ka qenë vendim politik që ka pasur implikime politike.

“Kosova ka ulje të vëllimit të importit, që nënkupton se ka rritje të prodhimit vendor. Nga paslufta nuk kemi pas rënie të vëllimit të importit. Kjo nënkupton se janë zëvendësuar nga prodhimi. Ka pasur rritje të punësimit. Me anketa që kemi bërë me prodhues ka pasur raste që kanë shënuar rritje të prodhimit dhe rritje të punësimit”, ka thënë Panxha.

“Kur është vendosur taksa në aspektin ekonomik është paraproklamuar se do të ketë mungesë të produkteve, eskalim të çmimeve. Rritje të çmimeve ka pasur, por jo për shkak të taksës, por ka pasur tregtarë që kanë dashur të përfitojnë në emër të saj”, ka thënë ai kushtuar njëvjetorit të tarifës së vënë nga Qeveria e Kosovës.

“Prodhimi në Kosovë ka shënuar rritje. Numrat tregojnë se ka pasur impakt pozitiv ekonomik. Serbia në të kaluarën të gjitha temat në domenin ekonomik i ka anashkaluar por njëra ka pasë ndikim të madh”.

Panxha ka theksuar se masa e paralajmëruar për reciprocitet ndaj Serbisë duhet të vlejë edhe për Shqipërinë.

“Qeveria e ardhshme duhet të jetë vendimtare si duhet qasur Serbisë. Politika tregtare ndaj Kosovës nuk dallon shumë prej Serbisë nga Shqipëria. Njëra shtet vëllazëror, tjetri armik. Barrierat ekonomike i kemi nga të dyja vendet. Reciprociteti nënkupton jo vetëm me Serbinë por edhe me Shqipërinë”.

“Prodhuesit e Kosovës janë të izoluar me barriera artificiale. Shqipëria del vendi i dytë për barriera jotarifore pas Serbisë që ka ndaj Kosovës”, ka shtuar ai.