Universitetet afgane rihapen, vajzat dhe djemtë ndahen me perde në klasa

Studentët në të gjithë Afganistanin kanë filluar të kthehen në universitet për herë të parë që kur talibanët erdhën në pushtet, dhe në disa raste femrat janë ndarë nga bashkëmoshatarët e tyre meshkuj me perde ose dërrasa në mes të klasës.

Kur sundoi për herë të fundit nga 1996-2001, grupi ndaloi vajzat nga shkolla dhe gratë nga universiteti dhe puna. Pavarësisht nga garancitë në javët e fundit se të drejtat e grave do të respektohen në përputhje me ligjin islam, është e paqartë se çfarë do të thotë kjo në praktikë, përcjellë Klankosova.tv.

Mësuesit dhe studentët e universiteteve në qytetet më të mëdha të Afganistanit, Kabul, Kandahar dhe Herat, i thanë Reuters se studentet femra po ndahen në klasë, mësojnë veçmas ose kufizohen në pjesë të caktuara të kampusit.

“Vendosja e perdeve nuk është e pranueshme. Unë me të vërtetë u ndjeva tmerrshëm kur hyra në klasë … Ne gradualisht po kthehemi në 20 vjet më parë.” tha Anjila, një studente 21-vjeçare në Universitetin e Kabulit.

Edhe para se talibanët të merrnin Afganistanin, Anjila tha se ishin ulur veçmas nga meshkujt, por sipas saj klasat nuk ishin të ndara fizikisht.

Një dokument që përshkruan udhëzimet për rifillimin e mësimit, që qarkulloi nga një shoqatë e universiteteve private në Afganistan, listoi masa të tilla si mbajtja e detyrueshme e hixhabëve dhe hyrje të veçanta për studentet femra, raporton Reuters, transmeton Klankosova.tv.

Gjithashtu thuhet se mësueset femra duhet të punësohen për të mësuar nxënëset femra, dhe se femrat duhet të mësohen veçmas ose, në klasa më të vogla, të ndara me një perde. Mirëpo është e paqartë nëse dokumenti, i parë nga Reuters, përfaqëson politikën zyrtare të talebanëve.