Gjyqi më i madh mafioz në dekada: Dënohen 70 anëtarë të Ndrangheta

Një gjykatë në Itali dënoi 70 anëtarë të grupit të fuqishëm mafioz Ndrangete, në fazën e parë të gjyqit më të madh mafioz në dekadat e fundit.

Në dy vitet e ardhshme, 355 anëtarë të mafias dhe zyrtarë të korruptuar do të përballen me gjykatën për pjesëmarrje në grupin mafioz më të pasur dhe më të fuqishëm në Itali.

Qindra avokatë dhe afro 1000 dëshmitarë po marrin pjesë në gjyq, raporton bbc.

“Maxi gjyqet” u zhvilluan me dyer të mbyllura në një sallë gjyqi të përgatitur posaçërisht në qytetin kalabrez të Lamezia Terme.

Të pandehurit kishin në dispozicion një gjykim të përshpejtuar dhe ulje të dënimeve me një të tretën nëse shpalleshin fajtorë. Në këtë rast, gjyqtarët dënuan me nga 20 vite burg gjashtë persona. 21 persona u lanë të lirë.

Ndrangeta është një rrjet kriminal me rreth 150 familje. Ky gjyq ka të bëjë vetëm me njërin prej tyre – familjen Mancuso.

Lista e gjatë e akuzave përfshin vrasje, tentativë vrasje, zhvatje, zbulim të sekreteve shtetërore, shpërdorim detyre dhe lakmi.

Bosi i supozuar Luigi Mancuso (67), i mbiquajtur “Xhaxhai” dhe ish-senatori Giancarlo Piteli (68) do të përballen më vonë me një gjyq më të gjatë.

Ndrangheta u ngrit pas sprovave të mëdha në fund të viteve 1980, të cilat dobësuan ndjeshëm familjet e organizatës mafioze siciliane Cosa Nostra.

Ndrangheta është e përfshirë në një gamë të gjerë aktivitetesh të paligjshme, por specialiteti i saj është tregtia e kokainës dhe besohet se kjo organizatë mafioze kontrollon rreth 80 për qind të tregtisë evropiane të asaj droge.