Holanda hyn në bllokim 3-javor/ Përplasje të ashpra mes protestuesve dhe policisë pas shpalljes së vendimit

Holanda do të kthehet në një bllokim të pjesshëm nga nesër të shtunën , pasi qeveria urdhëroi restorantet dhe dyqanet të mbyllen më herët dhe ndaloi spektatorët nga ngjarjet kryesore sportive, në një përpjekje për të frenuar rritjen rekord të rasteve me Covid-19.

Kryeministri në detyrë Mark Rutte tha se kufizimet shëndetësore, të cilat holandezët mendonin se do të përfundonin mirë, do të ri-vendosen brenda tre javësh. Baret, restorantet dhe dyqanet e nevojshme, si supermarketet duhet të mbyllen në orën 20.00 me orën lokale, ndërsa dyqanet e panevojshme në orën 18.00.

Vendimi shkaktoi reagime të ashpra, ndërsa në Hagë dhe qytete të tjera të Holandës shpërthyen trazira dhe përplasje mes protestuesve dhe forcave të policisë.

Po ashtu, qytetarëve holandezë u bëhet thirrje që të mos pranojnë më shumë se 4 persona në shtëpitë e tyre dhe të bëjnë punë me telekomunikacion, “përveç nëse kjo nuk është realisht e mundur”, shtoi kryeministri holandez, duke thënë gjithashtu se do të vendosen sërish masat e distancimit social.

Demonstratat publike nuk do të lejohen dhe ndeshjet e futbollit do të zhvillohen me dyer të mbyllura, duke përfshirë ndeshjen e javës së ardhshme mes Holandës dhe Norvegjisë. Shkollat ​​do të qëndrojnë të hapura dhe daljet do të lejohen.