“Hitleri kishte gjak hebre”, Putin kërkon falje për deklaratat e Lavrovit

Izraeli ka bërë me dije se Vladimir Putin ka kërkuar ndjesë për deklaratat e ministrit të Jashtëm rus, i cili tha se Adolf Hitleri ka pasur “gjak hebre”.

Sipas zyrës së shtypit të Kryemnistrisë izraelite, Presidenti i Rusisë ka telefonuar kryeministrin e Izraelit, Naftali Bennett, për t’i kërkuar falje.

Sergey Lavrov tha gjatë fundjavës se diktatori nazist Adolf Hitler kishte “gjak hebre”. Këtë koment e bëri në tentativë për të krahasuar Hitlerin me Presidentin e Ukrainës, Volodymyr Zelensky, i cili është me prejardhje hebreje.

“Zelensky përdor këtë argument: çfarë lloj nazizmi mund të kenë ata si shtet kur lideri është Hebre. Mund ta kem gabim, por Hitleri kishte edhe gjak Hebre. Kjo nuk do të thotë absolutisht asgjë. Populli i mençur hebre thotë se antisemitët më të zjarrtë janë zakonisht hebrenjtë”, tha Lavrov.

Zyra e shtypit e Naftali Bennett tha se kryeministri i Izraelit e pranoi ndjesën e Putinit dhe e falenderoi që e sqaroi këtë çështje. Por, vetë Rusia njofton se Putin me Bennett kanë diskutuar mbi Holokaustin, por nuk foli për një kërkim ndjese nga ana e Putinit./a2cnn