Përvëlohet Europa, kafshët digjen të gjalla nga temperaturat e larta (FOTO)

Autoritetet në Francë kanë lëshuar alarmin e kuq për motin e nxehtë, pasi për herë të parë në histori në pjesën jugore të saj u regjistruan temperatura mbi 45 gradë.

Shërbimi kombëtar i motit e ngriti nivelin e alarmit nga portokalli në të kuqe për rajonet Herault, Gard, Vaucluse dhe Bouches-du-Rhone, duke thënë se të gjithë qytetarët duhet të kenë kujdes nga kjo gjendje, përfshirë edhe ata që janë në gjendje të mirë shëndetësore.
Zyrtarët paralajmëruan se gjendja mund të rëndohet edhe më shumë, pasi vapa me prejardhje nga Saharaja pritet ta arrijë kulmin të hënën.

Shumë ferma kafshësh janë përfshirë nga flakët në Spanjë. Gjendja është më e rëndë në rajonin e Katalonjës, ku shumë kafshë janë djegur për së gjalli nga zjarret e dala nga kontrolli.

Zjarret në natyrë janë përhapur edhe në Greqi dhe Gjermani. Europa po përballet me temperaturat më të larta që janë regjistruar ndonjëherë në muajin qershor. Rekordi i temperaturës më të lartë për këtë muaj është thyer të mërkurën në Gjermani, Poloni dhe Republikën Çeke.

Në Itali, dy persona të moshuar kanë vdekur nga vapa, ndërsa shtatë qytete të këtij vendi e kanë lëshuar alarmin e kuq për shkak të temperaturave jashtëzakonisht të larta.