Bien çmimet e karburanteve në tregun ndërkombëtar

Çmimet e naftës kanë rënë nën 121 dollarë në tregjet ndërkombëtare, të nxitura nga shqetësimet për ekonominë botërore dhe kërkesën për karburant në pritje të një rritjeje të normave kryesore të interesit në SHBA.

Në tregun e Londrës, çmimi i një fuçi ra me 50 cent në krahasim me mbylljen e mëparshme, në 120,67 dollarë. Në tregun amerikan, një fuçi ra me 71 cent dhe u tregtua me 118.22 dollarë.

Tregtarët presin përfundimin e seancës së bankës qendrore amerikane, e cila pritet të rrisë normat e interesit për të frenuar inflacionin e lartë, raporton reuters.

Një shtrëngim më i theksuar i politikës monetare mund të shkaktojë një recesion që do të shkatërronte kërkesën, shton analisti i PVM, Stephen Brennock. Shqetësimet për kërkesën ushqehen gjithashtu nga një valë e re e COVID-19 në Kinë, pasi autoritetet mund të nxisin rikthimin e bllokimit.

Çmimet më të larta të naftës dhe parashikimet më të dobëta po e zbehin perspektivën e kërkesës për naftë, njoftoi të mërkurën Agjencia Ndërkombëtare e Energjisë (IEA). Një rënie e konsiderueshme e çmimeve u parandalua nga oferta e kufizuar. Organizata e Vendeve Eksportuese të Naftës (OPEC) dhe aleatët e saj po luftojnë për të arritur kuotat e prodhimit dhe problemi i fundit është kriza politike në Libi.

Mbështetja e çmimeve është ofruar edhe nga furnizimi i kufizuar me benzinë. Presidenti i SHBA-së, Joe Biden u ka kërkuar kompanive të naftës të shpjegojnë pse nuk e ofrojnë më atë në treg. OPEC njoftoi se një fuçi e naftës kushtoi të martën 123,73 dollarë, që do të thotë se u rrit me 3,07 dollarë në krahasim me ditën e mëparshme të tregtimit.