Vdiq ish-Papa Benedikti XVI

Ish-papa Benedikti XVI ka vdekur në rezidencën e tij në Vatikan të shtunën, në moshën 95-vjeçare, pothuajse një dekadë pasi u largua nga pushteti për shkak të shëndetit, shkruan BBC.

Ai drejtoi Kishën Katolike për gati tetë vjet derisa, në vitin 2013, ai u bë Papa i parë që dha dorëheqjen që nga Gregori XII më 1415.

Benedikti i kaloi vitet e tij të fundit në manastirin Mater Ecclesiae brenda mureve të Vatikanit.

Pasardhësi i tij Papa Françesku ka thënë se e kishte vizituar shpesh atje.

“Me dhimbje ju njoftoj se Papa Emeritus, Benedikti XVI, ndërroi jetë sot në orën 9:34 në Manastirin Mater Ecclesiae në Vatikan. Informacione të mëtejshme do të jepen sa më shpejt që të jetë e mundur”, thuhet në njoftimin e Vatikanit.

Edhe pse ish-Papa ishte i sëmurë për disa kohë, Selia e Shenjtë ka thënë se kishte përkeqësim në gjendjen e tij për shkak të moshës.

I lindur në Gjermani, Benedikti ishte 78 vjeç kur në vitin 2005 u bë një nga papët më të vjetër të zgjedhur ndonjëherë.

Për pjesën më të madhe të papatit të tij, Kisha Katolike u përball me akuza, pretendime ligjore dhe raporte zyrtare gjatë dekadave të abuzimit të fëmijëve nga priftërinjtë.

Në fillim të këtij viti, ish-Papa pranoi se ishin bërë gabime në trajtimin e rasteve të abuzimit kur ai ishte kryepeshkop i Mynihut midis viteve 1977 dhe 1982.