Heqja e vizave për serbët me pasaporta ilegale – VV-ja fajëson BE-në e AAK-ja e quan vendim të keq

Deputeti i Lëvizjes Vetëvendosje, Arbër Rexhaj, ka thënë se Këshilli i Bashkimit Evropian ka marrë vendimin për heqjen e vizave për qytetarët serbë të Kosovës të cilët kanë pasaporta të Serbisë, pa u konsultuar me Kosovën. Rexhaj theksoi për Ekonomia Online se ky vendim është arbitrare dhe është ndërhyrje e drejtpërdrejtë në sovranitetin e Kosovës.

Kurse, opozita po e vlerëson se ky vendim që e cenon sovranitetin e vendit, është pasojë e udhëheqjes jo të mirë të diplomacisë dhe politikës së jashtme të Kosovës.

“Kjo në fakt nuk është bërë në konsultim me Qeverinë e Kosovës. Fillimisht është vendosur në formë arbitrare, nuk janë dëgjuar dhe analizuar pra në teren të dhënat edhe analizat me aq sa unë kam informacion dhe e dyta kjo është ndërhyrje e drejtpërdrejtë dhe minim në sovranitetin e Republikës së Kosovës”, ka thënë Rexhaj.

Rexhaj ka deklaruar institucionet ndërkombëtare po kanë më shumë konsideratë për Serbinë se sa për Kosovën, e kjo po ndodh pavarësisht asaj se Serbia duket hapur se është pala jokonstruktive.

“Është e papranueshme, ne jemi shtet i pavarur dhe natyrisht kemi marrëdhënie bilaterale me BE-në dhe mendoj që në këtë kuptim edhe atëherë kur është bisedu pala e Kosovës i ka dhënë arsyet e veta dhe në fakt kjo është zhvendos në formë automatike të shpejt dhe e ripërsërisë edhe njëherë duke e minu pra sovranitetin e Republikës së Kosovës”, ka thënë Rexha.“Tash Qeveria me institucionin ndërkombëtar do të bisedojë në kuptimin e dialogut, mirëpo ne shprehim indinjatën e thellë sepse përballë kërkesave të Serbisë BE-ja gjithmonë, sidomos kohëve të fundit pra, po duket sikur po e ledhaton Serbinë. Dhe marrë parasysh se Serbia po është pala jokonstruktive në dialog, e cila po e sulmon Kosovën në aspektin e sovranitetit dhe të përfaqësimit ndërkombëtar, e në anën tjetër mendoj që në këtë rast është dashur që ta themi në minimum të bashkëbisedimit të pyetet pra Kosova sepse po merret një vendim për qytetarët e Kosovës sepse pa dallim qytetarët serb që jetojnë në Republikën tonë janë edhe qytetarë të Kosovës, pra janë kosovarë”, ka vijuar deputeti.

Ndërsa, deputeti i Aleancës për Ardhmërinë e Kosovës, Shemsedin Dreshaj, ka deklaruar se ky vendim nga Bashkimi Evropian është një alarm për Qeverinë dhe në rast të praktikimit të saj, atëherë do të jetë një hap i radhës në acarim të raporteve ndërmjet Kosovës dhe Serbisë. Ai ka shtuar se ky vendim po ndikon drejtpërdrejt në cenim të sovranitetit.

“Ky është një vendim shumë i keq për Kosovën në veçanti është vendim i keq edhe për Bashkimin Evropian për shkak se praktikisht po e cenon sovranitetin e vendit duke u përzier në mënyrë flagrante drejtpërdrejt në dokumentet e udhëtimit jashtë vendit”, ka shtuar ai.

Dreshaj për këtë vendim ta pafavorshëm në drejtim të Republikës së Kosovës ka thënë se një faj bie mbi udhëheqjen jo të duhur nga Ministria e Punëve të Jashtme e që sipas tij ky dikaster nuk po udhëhiqet nga drejtuesit, mirëpo atë po e bën presidentja Vjosa Osmani.

“Mendoj se është dështim i politikës së jashtme të vendit, nuk kemi asnjë njohje asnjë prononcim, asnjë promovim praktikisht politikën e jashtme është duke e udhëhequr zonja Osmani, presidentja e vendit ndërsa Qeveria është krejtësisht e anashkaluar. Unë i shoh si vizita të cilat i kanë shërbyer vendit në drejtim të internacionalizimit të çështjes së vendit”, ka thënë deputeti Dreshaj për EO./EO