“Golden Sabre 2025” – mbi 600 pjesëtarë nga institucionet e sigurisë bëhen bashkë në ushtrimin për menaxhimin e krizave

Misioni i KFOR-it i udhëhequr nga NATO, Misioni i Bashkimit Evropian për Sundimin e Ligjit në Kosovë (EULEX) dhe Policia e Kosovës (PK) do të zhvillojnë aktivitete stërvitore së bashku në kuadër të ushtrimit “Golden Sabre 2025” në Kampin Vrella në Prishtinë, më 9 dhe 10 qershor.

Sipas njoftimit thuhet se ky ushtrim do të testojë zbatimin e procedurave për menaxhimin e krizave në skenarë të ndryshëm sigurie dhe do të ndihmojë në përmirësimin e aftësisë së këtyre institucioneve për të operuar së bashku. Në këtë ushtrim do të marrin pjesë mbi 600 pjesëtarë.

“Golden Sabre 2025” është një demonstrim konkret i bashkëpunimit të mirëfilltë dhe të gjatë mes KFOR-it, EULEX-it dhe Policisë së Kosovës.

“Për herë të parë, në këtë ushtrim do të marrë pjesë edhe Forca e Sigurisë së Kosovës, në përputhje me mandatin e saj për mbrojtje civile, përmes aktiviteteve stërvitore për trajtimin dhe asgjësimin e sigurt të municionit shpërthyes dhe materialeve të rrezikshme”, thuhet në njoftim.

KFOR vazhdon të zbatojë mandatin e saj të gjatë nga OKB-ja – bazuar në Rezolutën 1244 të Këshillit të Sigurimit të Kombeve të Bashkuara nga viti 1999 – duke kontribuuar në një ambient të sigurt për të gjithë qytetarët dhe komunitetet në Kosovë, në çdo kohë dhe në mënyrë të paanshme, në koordinim të ngushtë me Policinë e Kosovës dhe EULEX-in, në rolet e tyre si reagues të sigurisë.