Bizneset kërkojnë të shtyjnë pagesat në afat 3 mujor për bankat dhe institucionet

Kryetari i Shoqatës së Naftëtarëve të Kosovës, Fadil Berjani, i ka dërguar një letër kryeministrit Albin Kurti me anë të së cilës ka kërkuar që si masë parandaluese për koronavirusin të shtyhen të gjitha pagesat nga bizneset pa interes dhe pa penallti për një afat 3 mujor, për Bankat e Kosovës dhe në të gjitha institucionet tjera të qeverisë që nuk prekin vitalitetin e funksionimit të shtetit.

Kjo është letra e plotë e Berjanit:

I nderuari Kryeminister z. Kurti,

Duke parë zhvillimet e fundit në Regjion dhe botë që janë duke vepruar në marrjen e masave preventive, bizneset e Kosovës po angazhohen në përkrahje të situatës dhe rekomandimeve të Qeverisë së Kosovës, andaj kërkojmë nga Ju z. Kryeministër, që të veproni në kohen kur është e arsyeshme që t’i merrni këto masa:

1. Të shtyhen të gjitha pagesat nga bizneset pa interes dhe pa penallti për një afat 3 mujor, për Bankat e Kosoves dhe në të gjitha instuticionet tjera të qeverisë që nuk prekin vitalitetin e funksionimit të shtetit.

Vlen të falenderojm të gjitha bizneset që furnizojnë me produkte të konsumit të gjërë për mos rritje çmimi dhe bizneset e naftes që në këtë moment po bëjnë edhe uljen e çmimeve.