Evropa, problemi i ri botëror: Trazirat vijnë nga Gjermania dhe Franca

Evropa është kthyer në shqetësimin më të madh të botës, pavarësisht tensioneve tregtare mes Shteteve të Bashkuara dhe Kinës që po kërcënojnë ekonomitë. Prodhimi industrial në 19 vendet e Eurozonës po bie me normën më të shpejtë që prej krizës financiare dhe përkeqësimi i kërkesës po vjen nga faktorët e brendshëm dhe ndërkombëtar.

Kjo ka shtuar rreziqet që ekonomia të rritet me rreth 1% këtë vit, një ngadalësim i mprehtë nga 2018-a, ndërkohë që edhe superfuqia e kontinentit, Gjermania, ndodhet në trazira.

Indeksi i Bloomberg për Evropën ndodhet në nivelin më të ulët që prej mesit të 2017-ës ndërsa tregjet e kapitalit në kontinent nuk kanë qenë ndonjëherë kaq të lira në krahasim me obligacionet, bazuar te gap-i i yield-it.

Problemi këtë herë është se ngadalësimi po godet bazën e rajonit. Ndërkohë që vende si Greqia ndodheshin në epiqendër të problemeve, këtë herë perspektiva e Gjermanisë është dobësuar, prej rënies së vazhdueshme në manifakturë.

Shpenzimet konsumatore kanë ngecur gjithashtu në Francë, pjesërisht prej protestave. Këto dy vende përbëjnë 50% të ekonomisë së Eurozonës. Analistët thonë se nëse Franca ndalon konsumin dhe Gjermania ndalon prodhimin, problemi do të bëhej serioz në Eurozonë.

Megjithatë, problemet nuk ndalojnë këtu, pasi interesat e borxhit në Itali kanë nisur të rriten ndjeshëm, prej menaxhimit të dobët fiskal dhe Brexit mbetet ende i pazgjidhur.

Një tjetër çështje të madhe përbëjnë zgjedhjet evropiane në muajin Maj, ku mund të shihet një ngritje e partive anti-Bashkimit Evropian.

Të dhënat këtë javë treguan se prodhimi industrial ra me 0.9% në dhjetor nga nëntori, sa dyfishi i projeksioneve. Rënia vjetore arriti nivelin më të ulët që prej vitit 2009 për Eurozonën.(SCAN)