Gjenden trupat e pajetë të gjashtë emigrantëve në brigjet e Libisë

Trupat e gjashtë emigrantëve, përfshirë një foshnje, një fëmijë dhe një grua u zbuluan të enjten në brigjet e Libisë.

Sipas burimeve lokale, banorët e qytetit perëndimor të Zuwaras i lajmëruan autoritetet dhe ndanë informacionin.

Personeli i sigurisë arrit deri tek trupat e dy fëmijëve, një gruaje dhe tre burrave që u gjetën të mbytur në plazh.

Viktimat, identiteti i të cilëve nuk mund të verifikohej, ishin shtetas të huaj që lundruan në Mesdhe me varkë nga Libia.

Burimet theksojnë se një operacion kërkimi nga zyrtarët e sigurisë po vazhdon përgjatë vijës bregdetare prej 90 kilometrash dhe se trupa të tjerë mund të zbulohen.

Burimet më tej theksuan se trupat mund të kenë qenë në det me ditë dhe kanë qëndruar në plazh për të paktën dy ditë.

Libia vitet e fundit është bërë një nga pikat e rëndësishme në kalimin e emigrantëve të parregullt afrikanë në Evropë.

Sipas shifrave të OKB-së, të paktën 632 emigrantë të parregullt gjatë këtij viti e kanë humbur jetën në aksidente detare në Mesdhe.