Grevat s’kanë të ndalur

Ministria e Arsimit dhe ajo e Shëndetësisë nuk po arrijnë t’i bindin mësimdhënësit dhe kirurgët që t’i ndalin grevat pavarësisht premtimeve të ndryshme, shkruan sot Gazeta Zëri.

Mosndryshimi i Ligjit për Paga dhe mosmiratimi i tij në Kuvendin e Kosovës pritet ta përkeqësojë edhe më shumë situatën, kjo pasi që mësimdhënësit kanë paralajmëruar vazhdim të grevës, ndërsa Federata e Sindikatave të Shëndetësisë ka paralajmëruar bojkot të përgjithshëm të punës.

Pas ndryshimeve të fundit të cilat janë bërë në Projektligjin për Paga, Sindikata e Bashkuar e Arsimit, Shkencës dhe Kulturës e Kosovës (SBASHK) ka marrë vendim që greva e mësimdhënësve të vazhdojë edhe më tej.

SBASHK-u ka vendosur që greva e mësimdhënësve të vazhdohet deri në rritjen e koeficientit prej 30 për qind.

Në anën tjetër, Federata e Sindikatave të Shëndetësisë së Kosovës gjatë ditës së djeshme  ka bërë apel që Ligji për Paga të kalojë sot në Kuvendin e Kosovës, përndryshe sipas tyre të gjitha institucionet publike shëndetësore do të bojkotojnë punën.