Këto janë arsyet përse gjykata ka ndaluar shitjen e iPhone në Gjermani

Një gjykatë e Mynihut vendosi sot një ndalim me kusht të shitjeve të modeleve të smartfonëve nga “iPhone” 7 deri tek X në Gjermani, duke i dhënë të drejtë prodhuesit të gjysmëpërçuesve “Qualcomm” në betejën e tij të gjatë juridike kundër Apple për shkelje të patentave.

“Nëpërmjet këtij gjykimi, shitja dhe qarkullimi i modeleve që nuk kanë licencë ndalohet në Republikën Federale të Gjermanisë”, njoftoi gjykata duke xituar modelet “iPhone” 7, 7 Plus, 8, 8 Plus, dhe X.

Megjithatë në këtë komunikatë theksohet se që të aplikohet ky vendim ende provizor, “Qualcomm” duhet të derdhë një depozitë prej 668,4 milionë eurosh.

“I takon akuzuesit që të derdhë këtë shumë nëse dëshiron që gjykimi të aplikohet provizorisht”, njofton gjykata.

“Për më tepër, vendimi nuk ka ende fuqi mbi këtë çështje, sepse është i mundur edhe apeli”, thuhet në komunikatën e gjykatës së Mynihut, përcjell Atsh.

“Qualcomm”, kolosi amerikan i gjysmëpërçuesve, akuzon gjigantin e elektronikës “Apple” se ka shkelur një prej patentave në lidhje me një mikroçip të instaluar në modele të caktuara të “iPhone”.