Kurti për lajmin se kosovari e vrau një polic në Serbi: Po grumbullojmë informacione, përcillni me vëmendje komunikatat tona

Kryeministri Albin Kurti paralajmëroi komunikata nga Policia, Ministria e Punëve të Brendshme dhe ajo e Jashtme, pasi u pyet në një konferencë për media për raportimet në Serbi se shtetasi i Kosovës, Artan Hajrizi është autor i vrasjes së një polici dhe plagosjes së një tjetri në në Loznicë të Serbisë, në kufirin serb me Bosnjë e Hercegovinën

Kurti tha se informacionet që tashmë dihen, i ka marrë edhe ai në mëngjes dhe se nuk ka “diçka shtesë”. Por tha se organet e sigurisë po i grumbullojnë informacionet për këtë.

“Ato informacione që i përmendët ju i kam marrur edhe unë sot në mëngjes. Nuk kam diçka shtesë, por organet tona të sigurisë e të rendit po i grumbullojnë informacionet dhe ju kisha lutur që përcillni me vëmendje në orët në vazhdim komunikatat e Policisë së Kosovës, Ministrisë së Punëve të Brendshme dhe të Ministrisë së Punëve të Jashtme dhe Diasporës”, tha Kurti.

Zëvendëskryeministri dhe ministri i Punëve të Brendshme i Serbisë, Ivica Daçiq e përmendi Artan Hajrizin, një 33-vjeçar nga Kosova, si autor të vrasjes së një polici në mesnatë në Loznicë.

“Policia në vend ka gjetur pasaportën e të dyshuarit të lëshuar nga institucionet e përkohshme të të ashtuquajturës Kosovë në emër të Hajziri Artan (33) dhe një letërnjoftim gjerman”, tha Daçiq.

Sipas raportimeve në Beograd, Policia serbe e kishte ndalur një automjet “Mercedes” dhe se i dyshuari duke dalë e ka qëlluar një polic në gjoks dhe policin tjetër në shpatull, duke ikur më pas.