Mustafa: Ndotja e ajrit si shkak i zvarritjes së funksionimit të sistemit të koogjenerimit

Kryeqyteti i Kosovës, Prishtina dhe disa qytete të tjera si Obiliqi, Mitrovica, Gjilani, Drenasi e Peja, ka një kohë të gjatë që përballen me këtë problem, por alarmi për gjendjen e rëndë është ndezur veçmas në tre vjetët e fundit, prej kur matësit e nivelit të ndotjes së ajrit kanë marrë më shumë vëmendje.

Për këtë ka reaguar eksperti i çështjeve ekonomike, Muhamet Mustafa.

Përmes një shkrimi në rrjetin social Facebook, profesori universitar, konsideron se problemi i ajrit do duhej të zgjidhej vite me parë, e për këtë thotë se komuna e Prishtinës nuk po shqetësohet fare.

Sipas tij zgjerimi i rrjetit të ngrohjes qendrore mbi bazën e koogjenerimit, është duke ecur me hapa shumë të ngadaltë, duke theksuar se shfrytëzimi i tij është bërë vetëm 50 për qind.

“Ndotja e ajrit në Kryeqytet rrezik për shëndetin apo të ngjashëm. Kështu edhe sot. Dhe, si edhe për shumëçka tjetër shohim një shqetësim shumë të vogël jo vetëm në udhëheqjen e Prishtinës por edhe në institucionet qendrore. Reagimi i tyre është një retorike shterpë. Për këtë është dashur të mendohet që nga pranvera  e këtij dhe dy-tri  viteve më pare. Shohim një aktivitet me hapa breshke për zgjerimin e rrjetit të ngrohjes qendrore mbi bazë të koogjenerimit , kapaciteti i të cilit është i shfrytëzuar ndoshta vetëm 50%”, ka thënë Mustafa.

Sipas Mustafës, është e çuditshme se si nuk janë mobilizuar gjithë burimet financiare , duke përfshirë edhe donatorët që kapaciteti i koogjenrimit, i inauguruar, 3-4 vite më parë, të shfrytëzohet 100%.

” Kjo është një sjellje çuditshme ngase këtu do të kishim efekte edhe në zvogëlimin e konsumit të energjisë edhe në reduktimin e ndotjes.  Prandaj është e çuditshme se si nuk janë mobilizuar gjithë burimet financiare, duke përfshi edhe donatorët që bile ky kapacitet i koogjenrimit, i inauguruar, 3-4 vite më parë, të shfrytëzohet 100 për qind! Në këtë mënyrë do të reduktohej ngrohja me dru e thëngjill që krahas automjete të vjetruara dhe KEK-ut konsiderohet si burim i madh i ndotjes. Nuk do të duhej të ishin dashtë më shumë se  dy sezona pranvere e vera për ta përfunduar këtë projekt të  zgjerimi të ngrohje qendrore në Prishtinë”, ka shkruar në fund ai.