Ndahet çmimi për storjen më të mirë kundër korrupsionit

Çmimin për storjen më të mirë kundër korrupsion për vitin 2018 e fitoi gazetarja e “Kohës Ditore”, Saranda Ramaj, me hulumtimin “Abuzimi me blerjen e barnave në Ministrinë e Shëndetësisë”.

“Satisfaksionin që ma ka dhënë rezultati i kësaj pune dyvjeçare u dëshmu edhe sot kur ministri [Uran] Ismaili tha që i kanë kursyer 6 milionë euro buxhet”, tha fituesja e çmimit.

Në këtë garë ishin katër storje hulumtuese.

Jeta Xharra dhe Faik Ispahiu aplikuan me serinë e emisioneve hulumtuese “Aksham Pazar me Aeroport Ndërkombëtar”.

Emisioni “Jeta në Kosovë”, që prodhohet nga BIRN për RTK, gjatë muajve prill-maj të vitit 2018 ka transmetuar ciklin e katër emisioneve hulumtuese mbi parregullsitë dhe korrupsionin në koncesionimin e Aeroportit Ndërkombëtar të Prishtinës “Adem Jashari”.

Rrëfimi ekskluziv që ka zgjatur 6 muaj për t’u hulumtuar, ka shpërfaqur një varg mangësish në përmbushjen e kontratës mes Qeverisë së Kosovës dhe kompanisë ‘Limak’ për menaxhimin e ANP-së, gjendjen e brishtë të sigurisë në Aeroport dhe punësimet familjare të zyrtarëve shtetërorë në këtë institucion publiko-privat.

Ndërsa storja e tretë kishte autor  eton Sopa me ‘Zyrtari i Komunës së Prishtinës “kapet mat” duke pranuar ryshfet’. Si dhe  Besnik Boletini dhe Besa Kalaja me “Dera e Punësimeve”.

Ky çmim është ndarë nga UNDP dhe Zyra Zvicerane për Zhvillim dhe Bashkëpunim.

Ceremonia është zhvilluar në kuadër të Javës kundër korrupsionit.