Një muaj paraburgim ndaj serbit që dyshohet se me një grup personave shtinë me armë e granata dore në drejtim të Policisë, ku u plagos një kapiten

Gjykata Themelore në Prishtinë, Departamenti Special, ka aprovuar kërkesën e Prokurorisë Speciale të Republikës së Kosovës (PSRK), duke ia caktuar masën e paraburgimit në kohëzgjatje prej 30 ditësh të pandehurit S.S., i dyshuar për sulm ndaj personit zyrtar dhe armëmbajtje pa leje.

Gjykatësi i procedurës paraprake, kërkesën e Prokurorisë e aprovoi si të bazuar, pas mbajtjes së seancës dëgjimore, raporton “Betimi për Drejtësi”.

“Sipas vlerësimit të gjyqtarit të procedurës paraprake qëndrojnë arsyet ligjore për caktimin e paraburgimit, ngase i pandehuri S.S me qëndrimin në liri mund të fshihet apo të arratiset me qëllim të shmangies nga përgjegjësia penale, për shkak të peshës së veprave penale për të cilat ngarkohet, e këtë duke marrë për bazë faktin se i njëjti ishte arratisur prej kohës kur dyshohet se është kryer vepra penale, po ashtu mund të fshihet apo të largohet lehtë nga Republika e Kosovës pasi i pandehuri është shtetas edhe i Republikës së Serbisë, si dhe nëse i pandehuri lihet që të mbrohet në liri, i njëjti do të tentoj që të ndryshoj provat e veprës penale apo do të tenton për të ndikuar në to”, thuhet në njoftimin e Gjykatës.

Gjykata po ashtu njofton se të shtunën, Policia e Kosovës së bashku me Doganën e Kosovës, përderisa ishin duke e ekzekutuar një urdhër të Departamentit Special të Gjykatës Themelore në Prishtinë, për kontroll të disa lokacioneve në lidhje me veprën penale të kontrabandimit të mallrave, Njësitë Speciale të Policisë së Kosovës dhe të Doganës, kishin shkuar në Zveçan për kontrollimin e objekteve të caktuara dhe pas përfundimit të kontrollit njësitë policore kanë qenë duke lëvizur me mjete të blinduara nga Zveçani në drejtim të Mitrovicës.

“Me të arritur në fshatin Rudarë, Komuna e Zveçanit, kishin hasur në një barrikadë dhe në një grup të personave ku bënte pjesë edhe i pandehuri S.S. Ky grup i personave ishin të armatosur dhe i kishin dalë në pritë zyrtarëve policor, ashtu që në momentin që e kanë parë policinë në vendin e incidentit, kishin filluar të shtinë me armë automatike dhe granata dore në drejtim të policisë dhe si rezultat i këtij sulmi, nga pjesët e granatës së dorës ishte plagosur zyrtari policor -Kapiten B.A”, thuhet në njoftim.

Bëhet e ditur se kndër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.

Ndërsa, në raportin 24 orësh të Policisë, thuhej se i pandehuri dyshohet për veprat penale “Vrasje e rëndë në tentativë”, “Sulm ndaj personit zyrtar”, “Armëmbajtje pa leje”, “Thirrje për rezistencë”, “Pjesëmarrje në turmë që kryen vepra penale dhe huliganizëm” si dhe “Asgjësim apo dëmtim i pronës”. /BetimipërDrejtësi