Serwer: Harrisit mund t’i duket Kosova si Tajvani e Ukraina

Profesori në universitetin amerikan Johns Hopkins dhe njohësi i zhvillimeve politike në Ballkanin Perëndimor, Daniel Serwer, ka thënë se administrata e presidentit të Shteteve të Bashkuara të Amerikës, Joe Biden ka paraqitur një politikë të qetë ndaj Serbisë. Por sipas tij, kjo nuk ka pse të vazhdojë nga Kamala Harris, emri i së cilës pritet të marrë nominimin për presidente nga radhët e demokratëve.

Në blogun e tij në internet, Serwer është shprehur se ardhja e mundshme e Harris në krye të SHBA-së, do të mund të kishte ndikim edhe në politikën në Ballkan.

Sipas tij, ajo është e ashpër ndaj Kinës, ashtu si presidenti Biden dhe ish-presidenti Donald Trump, por që është shprehur se “Kosova asaj mund t’i duket si Tajvani dhe Ukraina”, në aspektin e konflikteve territoriale.

Deklarata se Serbia po ndihmon arratisjen e të burgosurve kosovarë, Prokuroria Speciale edhe sot e interviston Ministren Haxhiu
“Harris është gjithashtu e ashpër ndaj Kinës, si Bideni ashtu edhe Trumpi. Kosova mund t’i duket si Tajvani dhe Ukraina. Kjo do të thotë se ajo duhet të ushqehet dhe mbrohet nga pretendimet territoriale të një shteti që është shpërbërë. Ajo s’ka gjasa të ketë simpati ndaj Asociacionit të komunave me shumicë serbe apo autonomisë së Republikës Serbe. Dikush duhet ta këshillojë herët dhe shpesh se të dyja janë të këqija”, ka shkruar ai.

Analisti politik është shprehur se administrata e presidentit Biden ka paraqitur një politikë të qetë ndaj Serbisë, por sipas tij, kjo nuk ka pse të vazhdojë nga Harris.

“Presidenti Vuçiq e ka orientuar Beogradin drejt Lindjes, duke u rreshtuar me Kinën, Rusinë dhe autokracitë e tjera, përfshirë Azerbajxhanin dhe Hungarinë. Furnizimet serbe me armatim për Ukrainë vlejnë, por ka mundësi që rrjedhin për çështje ekonomike…”, ka thënë ai.

Për luftën në Ukrainë, Serwer ka thënë se Harris do që Kievi të fitojë dhe Moska të humbasë, por “ajo nuk do të pajtohet lehtë për ndarjen e territorit”.

“Ky qëndrim mund të bartet në Ballkan. Nuk do të doja të isha ai që do t’i thoshte një presidenteje grua, me ngjyrë, se njerëzit e etnive të ndryshme nuk mund të jetojnë së bashku”, ka shtuar Serwer, derisa “risi” e ka cilësuar marrjen e detyrës së zëvendësndihmës sekretarit për Ballkanin Perëndimor nga Alexander Kasanof.