Vdes një 34-vjeçar nga Malisheva, dyshohet se e zuri rryma duke punuar në ndërtimtari në Prizren

Një 34-vjeçar nga Seniku i Malishevës dyshohet se ka vdekur si pasojë e kontaktit me rrymën gjatë kohës sa po punonte në ndërtimtari në fshatin Piranë të Prizrenit.

Rastin e ka konfirmuar për Gazetën Online Reporteri.net, zëdhënësi i policisë për rajonin e Prizrenit, Shaqir Bytyqi.

Ky i fundit ka bërë të ditur se rasti ka ndodhur ditën e djeshme rreth orës 10:00, dhe se mjekët dhe dëshmitarët në Spitalin Rajonal të Prizrenit kanë treguar se viktima ishte në gjendje të rëndë shëndetësore.

“Me datën 12.10.2024, rreth orës 10:00 policia është informuar se një person mashkull (V.M. 34 vjeç, nga Seniku i Malishevës), kishte kërkuar ndihmë mjekësore në Spitalin Rajonal në Prizren, patrulla policore ka shkuar në emergjencën e Spitalit Rajonal në Prizren, aty nga mjekët dhe dëshmitarët është informuar se viktima është në gjendje të rëndë shëndetësore”.

“Dyshohet se viktima gjatë kohës që ishte duke punuar në ndërtimtari në fshatin Piranë, Prizren kishte rënë në kontakt me rrymën elektrike”, tha Bytyqi