“Vrasja e Kulturës” ekspozon torturat në objektet kulturore të ish-Jugosllavisë

Fotografi të qendrave kulturore, teatrove, kështjellave e objekte të tjera kulturore, që u përdorën për tortura e vrasje gjatë luftërave në ish-Jugosllavi, u ekspozuan të shtunën në Prishtinë.

Ekspozita me 20 fotografi të Hrvoje Polan, është hapur brenda Galerisë së Fakultetit të Arteve të Universitetit të Prishtinës “Hasan Prishtina”, në kuadër të Festivalit “Mirëdita, Dobar dan” që po mbahet në Kosovë.

Fotografi Polan vdiq në vitin 2019, ndërsa organizatorët e Festivalit thanë se ekspozita shërben edhe si homazh ndaj të ndjerit.

Teatri i Qytetit të Drenasit, i fotografuar në vitet e fundit nga Polan, në vitin 1999 ishte përdorur për torturimin e dhjetëra shqiptarëve dhe vrasjen e së paku njërit prej tyre.

Këto tortura ishin vazhdimësi e një ofensive të forcave serbe në qytetin e Skenderajt, afër me Drenasin.

Një pjesë e Shkollës së Muzikës në Zenicë të Bosnje dhe Hercegovinës, ishte përdorur si qendër për mbajtjen e të burgosurve kroatë dhe serbë. Të burgosurit u torturuan dhe u rrahën.

Shumica e objekteve kulturore të fotografuara për këtë ekspozitë gjenden kryesisht në Kroaci, Bosnje e Hercegovinë dhe Kosovë.

Fotografitë u përfshinë edhe në librin “Vrasja e Kulturës” në të cilën Hrvoje Polan është bashkautor me Viktor Ivançiq dhe Nemanja Stjepançoviq.

Një qendër kulture në Bosnje dhe Hercegovinë ishte shndërruar në një kamp përqendrimi, ku sipas të dhënave dhjetëra mijëra persona ndër vite janë burgosur dhe torturuar.

Ky kamp ka shërbyer kryesisht për mbajtjen dhe torturimin e kroatëve dhe boshnjakëve nga serbët e Bosnje-Hercegovinës.

Mesazhi në ekspozitë synon të vë në pah faktin se në asnjërin prej monumenteve kulturore ku kanë ndodhur tortura, nuk është vendosur ndonjë memorial apo nuk është bërë asgjë për t’i kujtuar këto ngjarje.

Sipas autorëve të librit “Vrasja e Kulturës”, objektet kulturore ishin përdorur shpesh si kampe të torturës për shkak të infrastrukturës së përshtatshme.