Buxheti për barna dhe material shpenzues rikthehet në menaxhim të shërbimit spitalor

Rikthehet buxheti për barna dhe material shpenzues nga Ministria e Shëndetësisë në menaxhim të Shërbimit Spitalor, Klinik, Universitar të Kosovës. Ministri i Shëndetësisë, Uran Ismaili, tha për Radio Kosovën se ministria do të merret më politikëbërje, ndërsa furnizimin më barna do të bëjnë spitalet. Buxheti për barna dhe material shpenzues në vitin 2019 është rreth 110 milionë euro.

Bartja e kompetencave për menaxhimin e buxhetit nga Ministria e Shëndetësisë të Shërbimi Spitalor Klinik Universitar i Kosovës, është  një shpresë për furnizim më të mirë me barna dhe material shpenzues. Kështu tha për Radio Kosovën zëdhënësi i SHKUK-së, tha Shpend Fazliu.

“Drejtoria e përgjithshme ka angazhuar të gjitha kapacitetet në mënyrë që furnizimi me barna dhe material shpenzues të stabilizohet sa me shpejt”, tha Fazliu.

Ministri i Shëndetësisë, Uran Ismaili, tha se buxheti duhet të menaxhohet nga spitalet, ndërsa ministria do të merret me politikbërje.

“Ne jemi liruar nga ai buxhet, sepse nuk kemi pasur nevojë që të kontrollojmë buxhetin. Le t’u shkojë buxheti spitaleve, atyre që kanë nevojë dhe të jetë buxheti me afër pacientit”, tha Ismaili.

Duke u bazuar në procedurat e prokurimit, të cilat gjithmonë kanë qenë problem në këtë aspekt, atëherë nuk ka  shpresë për përmirësim, thotë  deputeti nga radhët e LDK-së, Haxhi Avdyli.

“Delegimi i kësaj përgjegjësie në SHSKUK, mund të shihet nga dikush si decentralizim, por unë mendoj që duke e parë organizimin e deritashëm të shëndetësisë, nuk jap shpresë, sepse tani drejtori i SHSKUK-së mund të thuhet se është me kompetenca shumë më të mëdha se sa Ministria e Shëndetësisë, ndërsa ministri më shumë sillet si drejtor i SHSKUK-së.”, thotë  ai.

Daut Kabashi, pacient, tha për Radio Kosovën se nuk është në dijeni se nga kush menaxhohet buxheti, por ai është i dëshpëruar me mungesën e barnave dhe, sipas tij, gjendja në shëndetësi është e njëjtë që nga pas lufta.

“Me një fjalë… i ka humb rendi prej koke e deri në fund. Çka di unë është se, populli po vuan. Shtresa e ulët e popullit, se shtresë të mesme nuk ka. Ajo e larta është akomoduar për veti, e ne gjithmonë në të njëjtën pozitë, vetëm me forca tona çka po mundem të bëjmë”.

Buxheti i Spitaleve të Përgjithshme për vitin 2019 është mbi 42 milionë euro, ndërsa  ai për QKUK-në është rreth 64­­­ milionë euro.