Ky është apeli i IKSHP-së për pickimin nga rriqrat

Instituti Kombëtar i Shëndetësisë Publike u bënë thirrje qytetarëve që të kenë kujdes ndaj pickimit të rriqrave, meqë tashmë janë shfaqur raste të pickimit nga rriqrat në disa komuna të Kosovës.

IKSHP ka dhënë edhe rekomandimet se si të evitohet pickimi nga rriqrat

Njoftimi i IKSHP-së:

Qytetarë kujdes! Rriqrat tashmë kanë filluar të pickojnë! Përmbajuni rekomandimeve të Institutit Kombëtar që të mbroheni nga Ethet vdekjepruese!

Në vatrat endemike ka filluar pickimi i rriqrave që është paralajmërimi i parë për mundësinë e shfaqjes së sëmundjes. Numri i të pickuarëve ka arritur në 120 në komunën e Malishevës, 76 raste në komunën e Suharekës, 33 raste në komunën e Klinës dhe 28 raste në komunën e Rahovecit si pasojē e qëndrimit në livadhe të pa kositura, shkurre dhe shtalla dhe veshmbathjes jo adekuate.

Tashmë ekipet profesionale po bëjnë repelimin e kafshëve.

Instituti Kombëtar rekomandon qytetarët për sivjet:

Mos qëndroni gjatë dhe pa nevojë në livadhe dhe vende me shkurre,

Nëse patjetër duhet të jeni të pranishëm në këto vende vesh rroba të gjata dhe pantallonat futni në çorapë,

Duhet të përdorni preparate me të cila lyejmë pjesët e trupit të cilat i dëbojnë insektet nga trupi i njeriut e sidomos në pjesët e zbuluara të trupit, (shuplakat, qafën),

Kontrolloni trupin mos keni ndonjë rriqër gjatë qëndrimit në vatër,

Kontrolloni përsëri trupin pas largimit nga livadhi apo vendet me shkurre,

Nëse keni rriqër në trup ofrohuni në qendrën më të afërt mjekësore sa më shpejt,

Kositja e barit të bëhet në vazhdimësi (oborr dhe livadhe),

Pastrimi dhe dezinfektimi i stallave të bëhet në vazhdimësi,

Mbajtja e higjienës personale në nivelin më të lartë./Gazeta Alo/