Dy vaksinat kundër koronavirusit aprovohen këtë muaj, por kur të jenë gati për qytetarët?

Derisa kanë mbetur më pak se 30 ditë nga përfundimi i këtij viti, duket se do të kemi dy vaksina të aprovuara për përdorim të gjerë kundër koronavirusit.

Vaksina e parë e gjigantit farmaceutik Pfizer dhe BionTek, tashmë është raportuar se ka arritur efektin mbi 95 për qind gjatë provave klinike. Prodhuesit kanë aplikuar në Agjencinë e Barnave dhe Ushqimit të Shteteve të Bashkuara të Amerikës, për përdorim emergjent të vaksinës.

Për aprovim nga kjo Agjenci, ka aplikuar edhe Moderna me vaksinën e cila është raportuar se është efektive mbi 94 për qind. Sipas raporteve të dy kompanive, vaksinat kanë vetëm disa efekte të lehta anësore dhe të njëjtat mund të marrin dritën e gjelbër për përdorim të gjerë brenda këtij viti.

Pfizer ka deklaruar se pritet të prodhojnë mbi 50 milion doza të vaksinës deri më 31 dhjetor, ndërsa vitin e ardhshëm mbi 1.3 miliard. Në anën tjetër Moderna planifikon të prodhojë rreth 20 milionë doza këtë vit dhe rreth 1 miliard vitin e ardhshëm.

Një vaksinë tjetër është ende duke u zhvilluar nga Universiteti i Oksfordit dhe kompania AstraZeneca. Por e njëjta ende nuk ka raportuar se rezultate efektive.

Ndërkaq vaksina e Novavax e cila është konsideruar si më shpresëdhënësja në luftën kundër koronavirusit, aktualisht është pezulluar, por zyrtarët kanë thënë se planifikojnë të fillojnë së shpejti me fazën e tretë të provave klinike.