Sergio Ramos dhe Pilar Rubio do të shkojnë në altar më 15 qershor, në një ceremoni që pritet të mbahet në katedralen e Sevillas, ku pritet të ketë rreth 400 të ftuar.
Çifti Ramos-Rubio janë bashkë që prej vitit 2013 dhe kanë sjellë në jetë edhe 3 fëmijë, ndërsa tashmë kanë vendosur të lidhin bashkë kurorën edhe në kishë.
Por siç raporton e përditshmja “AS”, dasma e Sergio Ramos pritet të bëhet e famshme për rregullat e saj strikte, për të gjithë të ftuarit që pritet të marrin pjesë.
Kështu është vendosur që në ceremoni të ftuarve t’u ndalohet të marrin me vete fëmijët nën 18-vjeç, teksa të vetmit nën këtë moshë, do të jenë fëmijët e çiftit.
Edhe veshja e të ftuarve, do të jetë një rregull i mirë-sanksionuar nga çifti, që gjithashtu ka vendosur të ndalojë edhe prezencën e celularëve, pasi dëshiron të ruajë privatësinë.
Nuk mungon rregulli i çiftit Ramos-Rubio, as sa i përket dhuratave të të ftuarve, të cilëve u është kërkuar që të mjaftohen vetëm me një donacion ndaj UNICEF, organizatë ku drejtues është edhe kapiteni madrilen.