Como ofron 40 milionë euro për Theo Hernandez, Milan e refuzon

La Gazzetta dello Sport pretendon se skuadra e Serie A që po lufton për mbijetesë, Como, ka ofruar 40 milionë euro për të nënshkruar me mbrojtësin e majtë të Milanit, Theo Hernandez, por oferta është refuzuar.

Como, klub i cili mbështetet nga një pronar i pasur indonezian dhe këtë sezon u ngjit në elitën e futbollit italian pasi kishte nisur nga Serie D, besonte se mund të siguronte shërbimet e francezit.

Raportohet se oferta është bërë gjatë ditëve të fundit, në një kohë kur kishte tensione mes Theo Hernandez dhe drejtuesve të Milanit, përfshirë trajnerin Sergio Conceicao.

Megjithatë, as klubi “Rossoneri” dhe as lojtari nuk e kanë marrë parasysh këtë ofertë, por tregon se Cesc Fabregas mendonte se mund ta joshte një yll të këtij niveli për të luajtur në klubin e tij.

Ndërkohë, në “San Siro” duket se po zhvillohet një spastrim i ekipit gjatë janarit. Alvaro Morata raportohet të jetë pranë një transferimi te Galatasaray, ndërsa Francesco Camarda është në rrugë për t’u huazuar te Monza.

Gjithashtu, Davide Calabria ka marrë një propozim nga Bologna, pasi kontrata e tij po shkon drejt skadimit dhe ai u përfshi në një debat të hapur me trajnerin Conceicao javën e kaluar.